Назым Қызайбай тұратын көшенің жолы жөнделді ме?

Олимпиада жүлдегері Қызайбай тұратын көшеде жөндеу жұмыстары жүргізілмеген. Әкімдік бұл ақпараттың жалған екенін және шындыққа сәйкес келмейтінін мәлімдеді.

Бұл туралы Алматы облысының әкімдігі хабарлады. 

«Әлеуметтік желілерде Қазақстан Республикасының бокстан еңбек сіңірген спорт шебері Назым Қызайбай тұратын Қарасай ауданы Іргелі ауылының көшелері жөндеуден өтіп жатыр деген бейнероликтегі ақпарат жалған және шындыққа сәйкес келмейді» делінген мәлімдемеде. 

Алматы облысы әкімдігінің мәлімдеуімен Париж Олимпиадасының қола жүлдегері Назым Қызайбайдың үйінің алдындағы жол жөнделе бастады деген қауесет жоққа шығарылды. 

Әкімдік Instagram парақшасында (@qarasai_akimdigi) көшенің суретін жария етті. Суретте жөндеу жұмыстарының жүргізілмегені анық көрініп тұр. 

Бұған дейін қазақ дзюдосы тарихында тұңғыш алтын иеленген Елдос Сметовтың үйінің жанында жол жөндеу жұмыстары жасалған еді. Өңір әкімдігі бұл жұмыстың демеушілік қаражатқа жүргізілгенін хабарлады. 

Еске сала кетелік, 2024 жылғы Париж жазғы олипиадасында 6-тамыз күні жартылай финалда қытайлық боксшы Ю Вумен жекпе-жекте төрешілер шешімімен жеңіліп, олимпиаданың қола жүлдегері атанды.