Назарбаевтың аты аталған аудиоролик радио эфирінен алынды

Мәжіліс депутаттығына үміткер Инга Иманбайдың аудиоролигі АвтоРадио эфирінен алынып тасталды. Тіркелмеген Демократиялық партия белсендісінің айтуынша, бұған өзінің промо-ролигіндегі экс-президенттің есімі себеп болған.

Orda.kz тілшісімен телефон арқылы сөйлескен Иманбай аудиожазбаны 9 наурызда эфирге шығару туралы келісім болғанын айтты. Депутаттыққа кандидат роликтің  ақысын сайлау қорынан төлеуге тиіс еді. Дайын аудиожазбаны Иманбайдың штабы 10 наурыз күні таңертең «АвтоРадио» редакциясына жолдаған.

— Радио мен теледидар үшін ОСК-ға 450 мың теңге бөлетін бейнероликті мемлекет есебінен төлемек болдым. Келісім солай болды. Біз келістік, бәрі жақсы болды. Сол күні жазба  екі-үш рет шықты. Бірақ содан кейін маған АвтоРадио қызметкері телефон соғып, роликті ауыстыру керектігін айтты, - дейді Инга Иманбай.

Оның айтуынша, одан аудиожазбадан тұңғыш президенттің аты-жөнін қиып тастауды сұраған.

— Маған редакцияға келіп, радиостанция басшылығымен сөйлесуді ұсынды. Бірақ біраз уақыттан кейін олар қайтадан телефон соғып, олардың басшылығы экс-президенттің атын алып тастауды шұғыл талап етіп отырғанын, осыған байланысты қиындықтар туындағанын, болмаса аудиоролигімді эфирден алып тастайтынын айтты. Мен бұндай жағдайға қатысты пікірімді өзгертуге дағдыланбағанымды ашық айттым. Назарбаев халықтан көп нәрсені ұрлады деп есептеймін. Оны қайтарып, әлеуметтік әділеттілік орнату керек. Видеода заңсыз ештеңе жоқ. Олар маған мені айыптамайтындарын айтты және бұл заңсыз деп те айтпады. Тыңдаушыларға сілтеме жасай бастады. Олар телефон соғып, шағым айтты дейді. Мен «Назарабевтың туыстарына сын ұнамай, арызданып жатыр ма?» деп сұрадым, - дейді ол.

Иманбай өзінің фейсбуктегі парақшасында Мәжіліс депутаттығына үміткер ретінде кез келген есімді атауға, оларды сынауға құқығы бар екенін жазды. Оның аудиожазбасында «Назарбаевтың жеке банкіне миллиардтаған доллар бөлінді» делінген.

— Бұл ақпарат БАҚ-та бір емес, бірнеше рет жарияланды, бұл туралы көптеген отандастарымыз біледі. Неліктен менің сайлауалды үгіт сөзімде бұл туралы айтуға рұқсат етілмейді? Әлде «Жаңа Қазақстан» үміткерлерге цензура орнатып жатыр ма?, – дейді  Иманбай.

Ол бұл оқиғаны өз құқығын бұзу және елде цензура орнату деп санайды.

Ал «АвтоРадио Қазақстан» өкілдері жағдайға қатысты пікір білдіруден бас тартты.