Назарбаевтың інісі Қайрат Сатыбалды бостандыққа шығады - ресми

16 тамыз 2024 15:36 Ильдар Адильченов

Қазақстанның экс-президенті Нұрсұлтан Назарбаевтың немере інісі Қайрат Сатыбалдының жазасын шектеу шарасына ауыстыру туралы өтініші қанағаттандырылды.

Өскемен қаласының №2 соты Қайрат Сатыбалдының өтелмеген жазасының бөлігін жеңіл жазаға ауыстыру туралы өтінішін қарады.

Сот анықтаған деректер

Сот үкімі бойынша Сатыбалды Қылмыстық кодекстің 28-бабы 3-бөлігі, 189-бабы 4-бөлігі және 28-бабы 3-бөлігі, 195-бабы 4-бөлігі баптары бойынша 6 жылға бас бостандығынан айырылып, мүлкі тәркіленді және 10 жыл мерзімге мемлекеттік қызметте лауазымдарды атқару құқығынан айырылды.

Сот процесіне қатысушылардың ұстанымы

Сотталушы өз өтінішін қолдап, қанағаттандыруды сұрады. Ол өзінің оң мінез-құлығын, сот үкімі бойынша келтірілген залалды өтегенін, сонымен қатар, мемлекетке 700 миллиард теңгеден астам қаражат пен мүлікті өз еркімен тапсырғанын дәлел ретінде келтірді.

Түзету мекемесінің өкілі сотталушының өтінішін қолдады.
Прокурор Қ.Сатыбалдының өтінішін қанағаттандыруды сұрап, ол жазаны ауыстыру шарттарын орындағанын және өз еркімен мемлекетке басқа мүлік тапсырғанын атап өтті.

Сот шешімі

ҚР Қылмыстық кодексінің 73-бабы орташа ауыр немесе ауыр қылмыс жасаған адамға қалған жазаны жеңіл жазаға ауыстыру мүмкіндігін көздейді, егер келесі шарттар орындалса:

жазаның кемінде 1/3 бөлігін өтеу;
келтірілген залалды толық өтеу;
жазаны өтеу тәртібін өрескел бұзбау.

Қ.Сатыбалды орташа ауыр және ауыр қылмыс жасаған. Ол жазасының 1/3 бөлігінен астамын өтеді. Түзету мекемесінің әкімшілігі сотталушының оң мінез-құлығын және тәрбиелік шараларға белсенді қатысқаны үшін көтермелеу барын атап өтті. Қылмыстардан келтірілген залал толығымен өтелді.

Жоғарыда айтылғандар негізінде сот сотталушының өтінішін қанағаттандырып, жазасының өтелмеген бөлігін 3 жыл 3 ай 7 күн мерзімге бостандығын шектеуге ауыстырды.

Қайрат Сатыбалды қателіктерін мойындап, өкініш білдірді. Міне, оның шын өкінгеніне соттың көзін жеткізген сөзі:

«Кез келген азамат үшін мемлекет мүддесі бірінші орында тұруы керек. Халқымыз: «Жаңылмайтың жақ, сүрінбейтің тұяқ болмайды» дейді. Мен өз қателіктерімді білемін.
Маған қатысты қозғалған қылмыстық іс аясында мен құзырлы органдармен бірлесе жұмыс істеп, заңсыз алынған барлық қаражатты қайтарып жатырмын. Елден заңсыз шығарылған дүние-мүліктерді қайтару әділдік орнап, халықтың мүлкін қайтару деп білемін.
Бұл мемлекет басшысының қабылдаған маңызды шешімдерінің бірі. Осы прецеденттің арқасында енді ел байлығын ешкім ұрламайды. Соңғы жылдары елімізде оң өзгерістер болып жатқанын көріп отырмын. Біз оларды қолдау үшін бірге әрекет етуіміз керек.
Мен президент саясатын толықтай қолдаймын. Барлық заңсыз капитал соңғы тиынына дейін елге қайтарылуы керек. Заң мен тәртіп сақталуы керек!
Мен халықтан, мен ренжіткен әрбір адамнан және мемлекет басшысынан кешірім сұраймын. Мұнда ойлануға көп уақыт бар. Мен өз кінәмді мойындадым және шын жүректен өкіндім. Тергеумен толық ынтымақтастым және барлық заңсыз активтер қайтарылды.
Мен Президенттің активтерді қайтару саясатын қолдаймын және менің үлгім басқаларға сабақ болады деп ойлаймын. Мен ренжіткен және қателескен барлық адамдардан кешірім сұраймын»

Сатыбалдыға пробациялық бақылау қойылды. Егер ол тұрақты жұмыс орнына ие болмаса, жазаның барлық мерзімі ішінде жыл сайын 100 сағат мәжбүрлі еңбекке тартылатын болады.

Сот қаулысымен оған келесі міндеттер жүктелді: сот қаулысы заңды күшіне енген күннен бастап 10 күн ішінде тұрғылықты жері бойынша пробация қызметіне есепке тұруға, тұрақты тұрғылықты жерін, жұмысын, оқу орнын пробация қызметін хабардар етпей өзгертуге болмайды. Сондай-ақ сотталушының түзелуіне және жаңа қылмыстық құқық бұзушылықтардың алдын алуға ықпал ететін басқа да міндеттерді орындау.

Егер міндеттер орындалмаса, бас бостандығын шектеу бір күн бас бостандығынан айыруға бір күн шектеу есебімен ауыстырылатыны түсіндірілді.

Сот қаулысы заңды күшіне енген жоқ және прокурордың өтініш беруіне байланысты шағымдануға жатады.

қайрат сатыбалды

Жаңалықтар

барлық жаңалықтар