Назарбаевтың күйеу баласы бас прокуратурадан өзі жайлы жазылған мақаланы тексеруді сұрады

Қазақстанның бұрынғы президенті Нұрсұлтан Назарбаевтың күйеу баласы, кәсіпкер Тимур Құлыбаев бас прокуратурадан бірнеше күн бұрын британдық "Financial Times" газетінде өзі жайлы жарияланған мақаладағы ақпаратты тексеруді сұрады. Оның прокуратураға жазған сұраныс хаты алғаш болып Inbusiness сайтында жарияланды.

Сайтта жарияланған хабарламада Құлыбаевтың мақаладағы ақпаратпен келіспейтіні және оны терістейтіні жазылған.

"Бизнесмен Т. Құлыбаев нақты фактілермен расталмаған тұжырымдар, ресми түсініктемелерге қайшы келетін өзара байланысты емес субъективті қорытындылар жиынтығы болып есептелетін дезинформациялық сыйпатты қамтыған мақаламен келіспейді. Т. Құлыбаев мақалада айтылған келісімге ешқашан тіке немесе жанама түрде араласқан емес. Жоғарыда баяндалған жайттарды ескере отырып, Т. Құлыбаев Қазақстан бас прокуратурасынан ресми түрде жан-жақты тексеруді өтінді" делінген хабарламада.

Назарбаевтың күйеу баласының бас прокуратураға жүгінуіне себеп болған мақалада "Құлыбаев Қытай мен Еуропаны жалғайтын газ құбыры жобасынан жасырын жолмен ондаған миллион доллар пайда көрді" деп айтылған болатын.