Назарбаевтар отбасының кедендегі жемқорлыққа қатысы бар ма?- Вице-премьер жауабы

2022 жылы экономикалық операторлар арқылы кедендегі заң бұзушылықтар үшін бюджетке шамамен 50 млрд теңге өндірілді.

Мәжіліс алаңында Orda.kz тілшісі Қаржы министрі Ерұлан Жамаубаевтан «Қазақстан мен Қытай арасындағы кедендік статистикадағы сәйкессіздікке қатысты тергеу жүріп жатыр ма, жоқ па? Кеденді тұңғыш президент Нұрсұлтан Назарбаевтың отбасы мен жақын серіктері басқарады деген қауесет шындыққа жанаса ма?» деп сұрады.

Жамаубаевтың айтуынша, құрамында Қаржы министрлігі, Бас прокуратура және басқа да құқық қорғау органдарының қызметкерлері бар жұмыс тобы шекарада «көптеген заң бұзушылықтарды» анықтаған.

«Барлық анықталған фактілер құқық қорғау органдарына берілді. Қазір тергеу амалдары жүргізілуде. Және, әрине, бюджет сол тәртіп бұзушылар дер кезінде төлемеген қаржымен толықтырылады. Өткен жылы заң бұзушылардан шамамен 50 млрд теңге өндірілді», - деді Қаржы министрі.

Кеденді шынымен де Нұрсұлтан Назарбаевтың отбасы мен жақындары бақылап отыр ма, деген сұраққа Жамаубаев «соңғы бенефициарларды өзіңіз атадыңыз» деді.

«Бірнеше экономикалық операторлар болды. Сіз өзіңіз соңғы бенефициарларды атадыңыз. Шындығында олардың саны көп. 15-тен астам экономикалық операторлар болды. Бірақ нақты қандай қылмыстық істер қозғалды және нақты қандай сома оны құқық қорғау құрылымдары анықтайды. Мен тек бюджетке түскен шамамен 50 млрд теңгеге жауап бере аламын», - деді министр.

2022 жылдың ақпанында Қазақстан мен Қытай арасындағы кедендік статистикадағы алшақтық 5,7 млрд долларды құрағаны белгілі болды. Оның 2,8 миллиарды жалған декларацияның салдарынан пайда болған.