Назарбаев зияткерлік мектебіндегі суицид: полиция мәлімдеме жасады

Осыдан бір апта бұрын Назарбаев зияткерлік мектебінде оқыс оқиға орын алды. Мектеп оқушысы өз-өзіне қол жұмсады. Алматы қалалық Ішкі істер департаменті бастығының орынбасары Рустам Әбдірахманов қылмыстық іс бойынша түсініктеме берді.

Бұл туралы Orda.kz хабарлады.

Тергеу апат болған күні басталды.

- Бостандық аудандық полиция бөлімінде тергеу жүргізілуде. Сегізінші сынып оқушысы. Жантүршігерлік оқиға. Бұл бала отбасының ең үлкені болатын. Отбасында төрт бала. Оқиғаның мән-жайын барлығы біледі деп ойлаймын. Осының барлығы бірнеше күн бойы БАҚ пен әлеуметтік желілерде дүрлікті, - деп түсіндірді Рустам Әбдірахманов тікелей эфирде.

Оның айтуынша, қазіргі уақытта іс қаралып жатыр.

Еске салсақ, 27 қазанда сабақтан кейін Алматы қаласындағы химия-биологиялық бағыттағы НЗМ-нің сегізінші сынып оқушысы сабақтан кейін өмірмен қоштасты. Бостандық полиция басқармасында ҚР Қылмыстық кодексінің 105- бабы бойынша іс тіркелді.

Осы мектептің бірнеше оқушысы белдемше киіп, суицид пен сексизм мәселесіне назар аударту үшін науқан ұйымдастырған.

Кейін баланың әкесі мектеп әкімшілігіне, сондай-ақ куратор мен психологқа талап-арызының жоқтығы туралы мәлімдеме жасаған.

Балалар омбудсмені Аружан Саин «тергеу қорытындысы белгілі болмайынша, баланың мұндай әрекетіне кім жауапты екенін айту ерте» деді.