Назарбаев Университеті ерекше мәртебесінен айырыла ма?

Ғылым және жоғары білім министрі Саясат Нұрбек Назарбаев университеті ерекше мәртебесінен айырыла ма, жоқ па деген сұраққа жауап берді.

Саясат Нұрбектің айтуынша, бұл жоғары оқу орнының мәртебесі заңмен белгіленген. Бұл ретте тек университеттер ғана емес, Назарбаев зияткерлік мектептері де ерекше атаққа ие.

«Сондықтан біз қазір заңның күшін жоя алмаймыз және өзгертпейміз де, мен сізге бірден айтамын. Біздің міндетіміз – бұл университеттің әлеуетін сақтау, ол санаулы толыққанды зерттеу университеттерінің бірі. Қазір оның төңірегінде, атап айтқанда, оқыту құнына қатысты көптеген болжамдар бар. Мен оны айтуға батылым жетеді: шын мәнінде, олар дұрыс емес. Және бұл өте күшті зерттеу университеті. Сондықтан мәртебе бойынша ештеңе жойылмайды»,- деді министр брифингте.

Ол 2022 жылдың жазында Нұрсұлтан Назарбаевты өз қорының және оған қарасты оқу орындарының қамқоршылық кеңесінің басшысы қызметінен айырған заңнамаға түзетулер бекітілгенін еске салды.

Оның орнына премьер-министр Әлихан Смайылов отырды.

«Университеттің қаржылық бөлігін де жақсарту, оның ғылыми-зерттеу әлеуетін күшейту бойынша шаралар қабылданатын болады. Өйткені мұнда тамаша база, инфрақұрылым, зертханалар бар. Енді осыны толық пайдалану керек. Сондықтан түзететін шаралар міндетті түрде болады, бірақ жалпы біз бұл университеттің мәртебесін, бағытын өзгертпейміз»,- деп қорытындылады Саясат Нұрбек.