Назарбаев Путинге өзінің естеліктерінің авторлық көшірмесін сыйға тартты

Қазақстанның бұрынғы президенті Нұрсұлтан Назарбаев Ресей президенті Владимир Путинге өзінің естеліктерінің авторлық көшірмесін сыйға тартты.

Бұл туралы ТАСС хабарлайды.

«Нұрсұлтан Әбішұлы Владимир Владимировичке кітабын жіберді. Ол президентке тапсырылады. Бұл түпнұсқа көшірме», -  деді Ресей лидерінің баспасөз хатшысы Дмитрий Песков.

Журналистер кітапта Назарбаев Путинге тұтас бір тарау арнағанын атап өтті.

Назарбаевтың айтуынша, Путин «сөздің де, істің де адамы», ол өз елін әлемдік держава мәртебесіне қайтара алды. Назарбаев әу бастан Путинмен ортақ тіл тапқанын жазады.

«Олардың мемлекет басшылары ретінде жиі кездескені сонша, тіпті бір кездері Путин Қазақстанда тіркелетін шығар деп әзілдеген» деп жазады ресейлік БАҚ.

Кітап «Менің өмірім. Бодандықтан бостандыққа» 1 желтоқсанда шығарылды және Қазақстан дүкендерінде сатылды. Тиражы 7500 дана. Кітап орыс және қазақ тілдерінде жарық көрді. «Меломан» дүкеніндегі бағасы – 6590 теңге.