Назарбаев өзіне ота жасаған дәрігерлерге ас берді

Қазақстанның экс-президенті Нұрсұлтан Назарбаев жүрегіне ота жасаған Ұлттық ғылыми кардиохирургиялық орталығының дәрігерлеріне палау алып берді.

Бұл туралы журналист Кирилл Павлов өзінің telegram-арнасында хабарлады.

«Елбасының есебінен палау. Палау жеткізу қызметі әлеуметтік желіде Нұрсұлтан Назарбаевтың жүрегіне ота жасатқаннан кейін кардиоорталық дәрігерлерін тамақпен қамтамасыз еткенін мақтан етті» делінген хабарламада.

Экс-президенттің тапсырыс берген мәзірдің құны 222 800 теңгені құрады.

Еске салсақ, бүгін елордада экс-президент Нұрсұлтан Назарбаев жүрегіне ота жасатты. Бұл туралы Назарбаевтың баспасөз хатшысы Айдос Үкібай мәлімдеді.

– Нұрсұлтан Назарбаев жүрегіне ота жасатты. Ота сәтті өтті. Тұңғыш Президенттің өміріне қауіп жоқ. Ол қазір бақылауда. Операция ұлттық ғылыми кардиохирургиялық орталықта белгілі кардиохирург Ю. Пяның жетекшілігімен өтті, – деп жазды Айдос Үкібай.