Назарбаев кез келген уақытта Қытайға келе алады – Си Цзиньпин

Қытай Халық Республикасының төрағасы Си Цзиньпин Қазақстанның экс-президенті Нұрсұлтан Назарбаевты туған күнімен құттықтады.

Бұл туралы elbasy.kz сайты хабарлайды.

Қытай басшысы Си Цзиньпин екі ел халықтарының арасындағы жан-жақты ынтымақтастықты тереңдетуге Нұрсұлтан Назарбаевтың қосқан үлесіне тоқталды. Ол Қазақстан мен Қытай арасындағы қазіргі мемлекетаралық қатынас тату көршіліктің үлгісі екенін атап өтті.

«Сіздің екіжақты қарым-қатынасты ілгерілету мен дамытуға қосқан үлесіңізді жоғары бағалаймын» делінген Қытай басшысының хабарламасында.

Сонымен қатар, Си Цзиньпин Қазақстанның тұңғыш президентін кез келген уақытта Қытай елінің құрметті мейманы ретінде қарсы алатынын жеткізді.

Нұрсұлтан Назарбаев келіп түскен хат-хабарлармен танысып, барлық құттықтау хаттардың авторларына жылы сөздері мен ыстық тілектері үшін ризашылығын білдіреді.