Назарбаев ескерткішін құлатқан жігіт депутаттармен кездесті

ҚР Парламенті Мәжілісінің депутаттары Талдықорғандағы қаңтар оқиғасынан кейін ұсталып, туыстарының айтуынша, түрмеде азапталған Азамат Батырбаевпен кездесті. Депутаттар одан «істеген ісіңе өкінесің бе?» деп сұрады.

Депутаттардың Азамат Батырбаевпен диалогы 5 ақпанда Алматы облыстық «Жетісу» телеарнасында көрсетілді. Депутат Берік Бекжановтың «Сізге түрмеде қысым көрсетіле ме? Олар күш қолдана ма? Мұнда емделіп жатырсың ба?» деген сауалдарына Азамат Батырбаев «ешқандай шағымым жоқ» деп жауап берді.

«Бүгін әлеуметтік желіде видео тарап жатыр. Тас лақтырып, таяқ ала жүгірген сіз бе? Жасаған ісіңізге өкінесіз бе?»  деген сұрақтарға Азамат Бақтыбаев оң жауап берді. Видеодан ауруханада депутаттар мен бірге полицейлердің болғанын көруге болады.

Бақтыбаевтың адвокаты Бауыржан Азанов өз парақшасында одан қорғаушы жоқ жерде жауап алу заңсыз және клиентке қысым көрсету әрекеті деп санайтынын жазды.

Телеарнаның хабарлауынша, Заңнама және сот-құқықтық реформа комитетінің мүшелері Ерлан Смайылов пен Берік Бекжанов Алматы облысының әкімшілік орталығына барып, қаңтар оқиғасына байланысты ұсталғандардың туыстарымен кездесті. Олар Бас прокуратура мен Ішкі істер министрлігі өкілдерімен мүгедектер мен кәмелетке толмағандарды босату мәселесін талқылайтындарын мәлімдеді.

Әлеуметтік желіде 38 жастағы Азамат Батырбаевтың азаптау белгілері бар суреттер тарап жатыр. Ол қаңтар айының басында Талдықорғанда «жаппай тәртіпсіздіктерге қатысты» деген күдікпен ұсталған. Туыстары Батырбаевты ұрып-соққанын, денесін ыстық темірмен күйдіргенін айтты. Өткен аптада Бас прокуратура Азамат Батырбаевқа азаптау фактісі бойынша айып тағылғанын хабарлады.