«Назарбаев билігі кетсін!». Алматыда наразылық шарасы өтіп жатыр

Алматыда парламент сайлауына бойкот жариялап, митингіге шыққан оппозициялық ұйымдар - тіркелмеген «Демпартия» мен «Oyan, Qazaqstan» қозғалысының белсенділерін полиция алаңға жеткізбей қоршап алды. Полиция жасағының қоршауында қалған олар өз талаптарын айтып жатыр.

Белсенділер «Сайлауға бойкот», «Назарбаев кетсін», «Нұр-Отан -  сатқындардың партиясы», «Нұрсұлтан, отанымды жеме» деп ұрандата бастағанда қоршау сыртында тұрған бір топ адам олардың сөзін бөлуге тырысты. Белсенділерге кедергі келтіруге тырысқандардың арасында журналист Қали Сәрсенбай, боксшы, Сидней Олимпиадасының чемпионы Ермахан Ибрагимов, Абай атындағы ҚазҰПУ-дың ректоры Тахир Балықбаев, ақын Маралтай Райымбекұлы бар. Олар микрафонмен «Мамай, сатқын» деп айқайлап, Қазақстаннның әнұранын шырқай жөнелді. Ал белсенділер олардың бұл әрекетін «арандату» деп атап, оларды «халық жағына өтуге» шақырды.

Бір-бірінің сөзін елемеген қос тарап жұлысуға дейін барды. Боксшы Ермахан Ибрагимов белсенділердің ұран жазылған плакатын жыртып, полиция қоршауында қалған белсенділерге атылды.

Қоршауда тұрған белсенділерге  қосылуға келе жатқан азаматтарды полиция оларға қарай жібермей тұр.

ORDA. тілшісі кемі он адамды полиция ұстап алып кеткенін көрді.