Назарбаев Байбекке пандемия кезінде қазақстандықтарға қолдау көрсетуді тапсырды

Қазақстанның Тұңғыш Президенті Нұрсұлтан Назарбаев «Нұр Отан» партиясы Төрағасының бірінші орынбасары Бауыржан Байбекті қабылдады, деп хабарлайды «Елбасы» сайты.

Олар сайлау алдындағы «Өзгерістер жолы: баршаға лайықты өмір!» бағдарламасын, сондай-ақ партияның сайлауаралық кезеңдегі жұмыс жоспарын одан әрі іске асыру мәселелерін талқылады.

-Парламент Мәжілісі мен барлық деңгейдегі мәслихаттар депутаттарының сайлауы өтті. Біз «Өзгерістер жолы: баршаға лайықты өмір!» сайлауалды бағдарламамызды қабылдадық. Енді оны жүзеге асыру мәселесіне назар аудару қажет, деп Нұрсұлтан Назарбаев нұсқау берді.

Қазақстанның Тұңғыш Президенті пандемия кезінде халықты қолдау бойынша партия жүргізіп жатқан жұмыстардың маңыздылығын атап өтті.

-Пандемия адамдардың әл-ауқатына және бизнеске кері әсер етеді. Сондықтан біздің міндетіміз - адамдарға барлық түрдегі қолдауды жалғастыру, - деді Нұрсұлтан Назарбаев.

Бауыржан Байбек партияның сайлау алдындағы уәделерін жүзеге асыруға арналған «Елбасы» республикалық жол картасын таныстыра отырып, осы жылы көрсеткіштердің 24% -ын орындау жоспарланғанын баса айтты.

- Республикалық Жол картасы Мәжілістегі фракцияда талқыланды. Іске асыру үшін 1700 индикатор қабылданды. Биылғы жылдың 24% индикаторларын орындау жоспарланып отыр. Сайлау бағдарламаларын іске асыру бойынша 216 жол картасы өңірлерде ашық талқыланды. Олардың шеңберінде 80 мың индикаторға қол жеткізу керек, алдағы бес жылда партияның сайлау алдындағы уәделері орындалады, - деп сендірді ол.