Назарбаев әулетінің шетелдегі активтері: Бұрынғы элитаға қалай іс қозғауға болады? 

Қаржы мониторинг агенттігі төрағасының орынбасары Жеңіс Елемесов шетелде активтерге ие болу қылмыс емес екенін түсіндіріп, қандай жағдайда тергеу бастауға болатынын айтты, деп хабарлайды Orda.kz.

«Егер сізде бұл актив қылмыстық жолмен алынғаны туралы нақты ақпарат болса, бізге беріңіз. Біз істі тіркеп, тергеу жүргіземіз. Ал жай ғана олардың активтері бар деп дәлел-дәйексіз айта салу дұрыс емес», – деді Елемесов.

Сонымен қатар, Назарбаев әулетінің мүшелері қымбат мүлікті қалай иеленгені туралы сұраққа Елемесов нақты жауап бермеді.

«Мен ондай сұрақтарға жауап бере алмаймын. Бұл үшін арнайы уәкілетті орган бар, солар тексеруі керек», – деді ол. 

Оның айтуынша, кез келген Қазақстан азаматы қылмыстық құқық бұзушылық белгілерін көрсе, өтініш бере алады.

«Егер ондай белгілерді байқасаңыз, жазып жіберіңіз. Біз істі тіркейміз. Бірақ ол үшін уәкілетті органның актісі қажет, онда мемлекетке келген нақты шығын – ұрлық қаражаты көрсетілуі тиіс. Содан кейін барып тергеу жүргізіледі», – деді Елемесов.

Еске сала кетейік, бұған дейін «Азаттық радиосы» Дубайда қазақстандық олигархтар мен шенеуніктерге тиесілі көптеген элиталық жылжымайтын мүліктің бар екенін анықтаған еді. Арасында Нұрсұлтан Назарбаев отбасының мүшелері де бар, олар виллалар, сарайлар және басқа да қымбат нысандарға иелік етеді. Зерттеу нәтижесінде шамамен 1500 қазақстандық азаматтың Дубайда құны 1 миллиард доллардан асатын мүлікке ие екені белгілі болды.

Еске сала кетсек, Orda.kz тілшілері Мемлекеттік кірістер комитетінің деректер базасынан бірінші президент пен оның қыздары және күйеу баласының ЖСН нөмірлері жоқ екенін байқаған еді.