Назарбаевқа арнау жазған ақынның басқа да қыздарға қырындағаны айтылды

Бұған дейін нағашысының күйеуі, ақын Ауыт Мұқибектің өзін қорлағанын айтқан продюсер Ақниет Ияр әлеуметтік желіде оның қысымына ұшыраған басқа қыздардың да әңгімелерімен бөлісіп жатыр.

Бірнеше қыз ақынды танығанын, әр жылдары тиіскенін айтып Ақниетке хат жазды. Олар аты-жөндерін жасырын қалдырған.

Қыздардың бірінің айтуынша, 2017 жылы дүкенде сатушы болып жұмыс істеп жүрген кезінде оған дәл осы ақын қырындаған.

«Ол әйелімен келді. Жұбайы аяқ киімін киіп жатқанда, ол маған жақындап, менің әдемі екенімді айтты. Немере інісіне нөмірімді сұрады. Мен бас тарттым. Сол күні кешке әйелінсіз, жалғыз келді. Мен олар бір заттарын ұмытып кеткен шығар деп ойладым. Жанына барып, сұрағанымда қолымнан қысып ұстап, өзінің ақын екенін, кітап жазатынын айтып, мен үшін келдім деп сендірді» деп жазды қыз.

Әрі қарай, арызданушының айтуынша, ер адам қайта-қайта келіп, шабыттану үшін онымен бірге бір түн өткізуді сұраған. Бір күні ол тіпті ізіне түсіп, аулаға сүйреп әкеткен. Қыз құтылып, қашып үлгерген.

Ақниет Ияр, өз кезегінде, бұл үшінші қыздың хаты екенін атап өтті.

Еске салсақ, продюсер Ақниет Ияр осыған дейін әлеуметтік желіде нағашы апасының күйеуінен сексуалдық қысым көргенін айтқан. Оның айтуынша, оқиға кезінде нағашысының күйеуі мен оның 5 жасар қызы ғана үйде болған.

Скриншот суреттері Ақниет Иярдың желідегі парақшасынан алынды