Назарбаев: 30 жыл ішінде Ресей мен Қазақстан арасында бірде-бір қақтығыс туындаған жоқ

Нұрсұлтан Назарбаев Ресей премьер-министрі Михаил Мишустинмен Қазақстан тұңғыш президентінің кітапханасында кездесті.

Бұл туралы Orda.kz Ресей үкімет үйінің баспасөз қызметіне сілтеме жасап хабарлайды.

Назарбаев кездесу кезінде екі мемлекет арасындағы достықты басқа елдерге үлгі санайтынын жеткізді. 

–  Мен Ресей-Қазақстан ынтымақтастығы барлық басқа мемлекеттер үшін үлгі деп санаймын. Одақ ыдырағаннан кейінгі 30 жыл ішінде бізде ешқандай келіспеушіліктер, қақтығыстар туындаған жоқ. Өйткені бірлескен құжаттарда қол қойғанымыздай, Қазақстан әрқашан біздің стратегиялық әріптестігімізді, мәңгілік достығымызды сақтауға ниетті. Бұл екі мемлекеттің мүддесі үшін де маңызды, - деді Назарбаев.

Өз кезегінде Ресей үкімет үйінің басшысы Мишустин Қазақстанда өткен келіссөздер нәтижесімен бөлісіп, президент Путиннен сәлем жолдады.

– Мен сізге бірінші кезекте біздің делегацияны жылы қабылдағаны үшін алғысымды білдіремін. Ресей Федерациясының президенті Владимир Путиннен сізге жылы сөздері мен жылы тілектерін жеткізгім келеді. Кеше Астанада түрлі жерлерде белсенді жұмыс істеп, құрметті Асқар Ұзақбайұлы Маминнің министрлер кабинетімен екіжақты кездесулер өткіздік, – деді Мишустин.

Естеріңізге сала кетейік, бұған дейін Михаил Мишустиннің Қазақстан президенті Қасым-Жомарт Тоқаевпен кездесуі өткен болатын.