Навальный экстремизмді қаржыландырғаны үшін 19 жылға сотталды

Сот оппозиция жетекшісі Алексей Навальныйды экстремистік қоғамдастық құрды, экстремистік әрекеттерді қаржыландырды, ашық түрде экстремизмге шақырды және нацизмді оңалтты деген айыппен 19 жылға бас бостандығынан айырды.

Мәскеу қалалық сотының көшпелі отырысы Владимир облысындағы ТК-6-да өтті, деп жазады РБК. Онда Навальный бұрынғы ісі бойынша жазасын өтеп жатыр. YouTube-тегі «Навальный Live» арнасының бұрынғы техникалық директоры, сонымен бірге осы іске қатысы бар Даниэль Холодный қатаң режимдегі колонияда сегіз жылға сотталды.

Прокурор оппозиционерді қатаң режимдегі колонияда 20 жылға бас бостандығынан айыруды сұрады. Навальныйға жеті эпизод бойынша айып тағылды. Алайда, сотталушының өзі бұл жерде жазаның қанша жыл екені маңызды емес екенін айтты.

Навальный мен Холодныйдың экстремизмге қатысты ісін Мәскеу қалалық сотының судьясы Андрей Суворов қарады, ол бұған дейін АҚШ азаматы Пол Уиланды тыңшылық (16 жыл түрмеде) және «Интер РАО-ның» бұрынғы топ-менеджері Карина Цурканға да тыңшылық ісі бойынша (15 жыл бас бостандығынан айыру) сот жазасын кескен болатын.

Навальныйға қарсы экстремистік қоғамдастық құру және оған жетекшілік ету бойынша қылмыстық іс 2021 жылдың қыркүйегінде қозғалған. Әңгіме Навальный құрған (Ресейде шетелдік агент және экстремистік ұйым деп танылған) Сыбайлас жемқорлыққа қарсы күрес қоры туралы болып отыр. 

Нәтижесінде, сот қоғамдастық міндеттері мемлекеттік органдардың беделін түсіру, аймақтағы жағдайды тұрақсыздандыру, халық арасында наразылық көңіл-күй туғызу және билікті күшпен ауыстыру қажеттілігі туралы қоғамдық пікір қалыптастыру, сондай-ақ жаппай тәртіпсіздікке ұласатын наразылық акцияларын ұйымдастыру және өткізуге итермелейді деп шешті.

Навальныйдың өзі барлық айыптарды жоққа шығарып, істі саясиландырылды деп атайды. Айта кетейік, оппозиционер 2021 жылдың ақпан айынан бері түрмеде отыр. Ол кезде оның Ив Роше ісі бойынша шартты жазасын нақты жазаға ауыстырған болатын.

Ол 2023 жылдың жазында босатылуы керек еді, бірақ 2022 жылдың маусымында алаяқтық ісі бойынша жаңа үкім күшіне еніп, Навальный тоғыз жылға қатаң режимдегі колонияға тоғытылды. Бұған қоса, биылғы жылдың сәуір айында Навальный өзіне қарсы бұл жолы лаңкестікке қатысты жаңа іс қозғалғанын мәлімдеген. Бұл істі әскери сот қарайды.