НАТО Ауғанстаннан әскерін шығару уақытын әлі айқындамады

НАТО қорғаныс министрлерінің Ауғанстаннан әскерін қай уақытта шығаратыны белгісіз. Брюссельде өткен басқосуда тиісті шешім қабылданбады.

Бұған дейін альянс елден өз күштерін мамыр айында әкетеді деген ақпарат тараған болатын. НАТО Бас хатшысы Йенс Столтенбергтің айтуынша, бұған дейін әскер саны қысқартылған. Дегенмен Ауғанстаннан толық шығару мәселесі көп ұзамай шешілуі керек.

«Ауғанстандағы әскерді шығаруға қатысты әлі шешім қабылданған жоқ. Алдағы уақытта ұйымға мүше елдер осы мәселені талқылауды күшейтетін болады. Ресми Кабул мен «Талибан» қозғалысы арасындағы келіссөз әлі жетістікке жеткен жоқ. Салдарынан елде зорлық-зомбылық күшейген. Біз Талибан қозғалысын барлық халықаралық лаңкестік ұйымдармен байланысты тоқтатуға шақырамыз», - деді НАТО бас хатшысы Йенс Столтенберг.

Ал керісінше Ирактағы сарбаздардың саны 500-ден 4 мыңға дейін көбейгелі отыр. Олар елдегі әскердің лаңкестермен күресуіне көмектеспекші.