Наталья Сац атындағы театрды жөндеуге не үшін 22 млрд теңге бөлінді?

Наталья Сац атындағы мемлекеттік академиялық балалар мен жасөспірімдер театры ғимаратты қайта қалпына келтіруге неліктен 21,7 миллиард теңге жұмсалатынын түсіндірді, деп хабардайды Orda.kz. 

13 қаңтарда Алматы қалалық құрылыс басқармасы мемлекеттік сатып алулар сайтында театр ғимаратын кеңейту арқылы қайта құруға 21,7 миллиард теңге жұмсалатынын  жазған. Жоба 2026 жылы аяқталады.

Театрдың бас режиссері Ирина Симонова қазір театр ғимараты қирайын деп тұрғанын айтты. Нысан 1980 жылдары салынған және ешқашан күрделі жөндеуден өтпеген екен. Сонымен қатар театрда қосалқы бөлмелер мен қоймалар жетіспейді. 

Қолданыстағы ғимаратты қайта жаңартуға 6 миллиард теңге және жаңа ғимарат салуға шамамен 9 миллиард теңге қарастырылған. Сондай-ақ екі ғимаратты байланыстыратын галерея салынады. Сыртқы желілер ауыстырылады және іргелес аумақты көгалдандыру мен көркейту жұмыстары жүргізіледі. Қалған ақшаға ғимаратты жабдықтармен қамтамасыз етеді. 

Еске салайық, 2024 жылы 4 наурызда Алматыда болған жер сілкінісі кезінде Наталья Сац атындағы театр зардап шеккенін хабарлаған едік.