Қызылордада төтенше жағдай: мал арам қатып жатыр

Қызылордада 500-ден астам мал қырылды. Сынама нәтижесі бойынша олар аштықтан өлген.

Бұл туралы Orda.kz Астана телеарнасына сілтеме жасап хабарлады.

Малдың арам өлуіне байланысты Арал ауданында төтенше жағдай жарияланды.

Сынама қорытындысы өңірдегі топырақтың құнарсыздығынан малдың аштықтан қырылғанын растады.

Қуаңшылыққа тап болған шаруалар жем-шөп алуға қиналып отыр. Себебі баға көкке жеткен, ал мемлекеттен субсидия алу қиындаған.

– Қазір жоңышқа қымбаттап жатыр. 600-700 теңгеден жоңышқа табылмай отыр. Келесі орым 800 дейді. 3-ші орымда бізге берсе 1000-1100 болады. Аралдың өзінде қазір 1200-1400 теңге болып тұр. Биыл мал қатты ауырып жатыр, өліп жатыр. Қыста біраз шығынға ұшыраған едік. Тағы шығынға батып жатырмыз, - деді шаруашылық төрағасы Нұрлан Биманов.

Аймақтағы жем-шөп бағасының өсуіне су тапшылығы себеп болған.

– Мал ішетін құдықтардан және қосымша көлдерден сынамалар алынды. Одан бөлек, өлген жылқыдан және мүйізді ірі қарадан сынама алынды. Облыстық ветеренарлық зертханаға тапсырылды. Нәтижесінде теріс нәтиже көрсетті. Яғни эпизотиялық ахуал тұрақты. Ауру жоқ. Қуаңшылыққа байланысты мал қысқа өте күйсіз түскен. Соның есебінен болып отыр, - деп түсіндірді облыстық ветеринария басқармасының басшысы Шахмардан Қойшыбаев.

23 маусымда Арал ауданында төтенше жағдай жарияланды. Мемлекет шаруаларға мал шығынын өтеп бермейді.

Қазір мемлекеттен бөлінген қаражатқа жем-шөп тасымалына қажетті жанар жағармайға, сондай-ақ жайылымдарда бітелген суаттардың көзін ашуға жұмсалады.