БҚО мүгедек жандар ғимарат алдында кезекте тұр

Батыс Қазақстан облысы Еңбек және халықты әлеуметтік қорғау департаментіндегі кезек халықтың наразылығын тудырды. Фотосуреттер әлеуметтік желіде жарияланды. Мүгедектердің осындай жағдайда қайта тексеруден өтетіні белгілі болды.

Орал тұрғыны Раул Упоров 23 желтоқсан күні таңертең халықты әлеуметтік қорғау бөліміне 50-ге жуық адам жиналғанын айтты.

«Нағыз тозақты көргіңіз келе ме? Кеңестік тар дәлізде өте көп адам жиналған. Барлығы әртүрлі жастағы мүгедектер. Балалар мен жасөспірімдерден бастап қарттарға дейін. Қозғалу мүмкін емес. Дәлізде бірнеше арзан креслолар қойылған. Жағдай жасаған түрлері. Мүмкіндігі шектеулі адамдар тұрып кезек күтеді, еденге отырады, баспалдаққа шығып тұрады, терезеде отырады. Мына әйел лифт жанында жатыр! Осы «мүгедектерге деген құрметтің» бәрі таңнан түске дейін созылады» деп жазды Рауль Упоров.

Оны басқа да желі қолданушылары қолдап, олардың да осындай жағдайға тап болғандарын жарыса айтты.

Ақпаратты Еңбек, әлеуметтік қорғау және көші-қон комитетінің БҚО бойынша департаменті басшысының медициналық-әлеуметтік сараптама жөніндегі орынбасары Ардақ Мұқанова растады.

«Пандемия кезінде мүмкіндігі шектеулі жандар қашықтан тексеруден өтті. Биыл жағдайдың жақсаруына байланысты олар бізге жеке келуге мәжбүр. Кезек бар. Мүгедектермен бірге жүретін адамдар келеді. Барлығына орындық жеткіліксіз. 1000-ға жуық адам қайта тексеруден өтуі керек» деді ол.

Департамент өкілдері тек жекеленген санаттағы азаматтардың үйлеріне баратыны белгілі болды.