Иранда «нәтижесі айқын» президент сайлауы өтіп жатыр

Иранда президент сайлауы өтіп жатыр. Көптеген сарапшы оның нәтижесі алдын ала айқындалып қойған деп санайды. Дауыс беру АҚШ санкциясының салдарынан ел экономикасы құлдырап, басқару жүйесіндегі қателіктер мен коронавирус індетінен туындаған дағдарыс тереңдеп, қоғамда наразы көңіл-күй артқан шақта өтіп отыр.

Бұл туралы Orda.kz Азаттық радиосына сілтеме жасай отырып хабарлайды.

Халықтың наразылығына қарамастан елдің рухани көсемі Аятолла Әли Хаменеи сайлауға бойкот жариялауға шақырған мемлекет «жауларына» шүйлігіп, ирандықтарды дауыс беруге шақырды.

Әрбір дауыс маңызды... келіңіз де дауыс беріп, президентіңізді таңдаңыз... бұл ел болашағы үшін маңызды, -  деді Тегеранда дауыс берген Хаменеи.

Жоғарғы соттың төрағасы, 60 жастағы Эбрахим Раиси екі реттік президент мерзімін атқарған Хасан Роуханиді алмастырады деген болжам бар. Ал сарапшылар Раисидің 1988 жылы бірнеше мың оппозиционерді дарға асу ісіне қатысқанын алға тартты. Адам құқығын қорғаушылар Эбрахим Раиси адамзатқа қарсы қылмыс жасаған дейді.