"Нұрсұлтан, Отанымды жеме!". Алматыда алаңға жиналғандарды полиция қоршап алды

Алматыда 1986 жылғы Желтоқсан көтерілісі мен 2011 жылғы Жаңаөзендегі мұнайшылар наразылығы құрбандарын еске алу шаралары өтіп жатыр. Қаладағы Тәуелсіздік монументінің және Желтоқсан құрбандарына арналған ескерткіштің жанына үш жүздей адам жиналды. Олардың арасында түрлі саяси топтың өкілі, қоғам белсенділері және қатардағы тұрғындар да бар.

Жиналғандар алдымен Желтоқсан құрбандарына арналған ескерткішке гүл шоқтарын қойып, марқұмдардың рухына құран бағыштады.

Содан кейін тіркелмеген Демократиялық партия жетекшісі Жанболат Мамай сөйлеп, "Бұл - той тойлайтын күн емес, қасіретті күн. Бұл күні Желтоқсан және Жаңаөзен құрбандарын еске алуымыз керек. Тәуелсіздік күні 25 қазан - тәуелсіздік декларациясы қабылданған күн" деді.

Мамай бастаған Демократиялық партия өкілдері сөйлеп жатқанда өздерін "желтоқсаншылармыз" деп таныстырған бір топ адам олардың сөзін бөліп, басқа микрафонмен сөйлей жөнелді. Олар Жанболат Мамайға "саяси ұран айтпа, Тәуелсіздік күнін митингіге айналдырма" деді. Ал Мамай бастаған Демократиялық партия өкілдері оларды "биліктің арандатушылары" деп атады.

Демократиялық партия мен желтоқсаншылар өзара қырқысып жатқан сәтте алаңға "Oyan, Qazaqatan" қозғалысының белсенділері келді. Олар монумент маңына аялдамастан қала көшелерін ұрандата жөнелгенде, полиция жасағы оларды қоршап алды.

Қоршауда қалған қозғалыс белсенділері "Нұрсұлтан, Отанымды жеме!", "Ұмытылмас Желтоқсан, Ұмытылмас Жаңаөзен", "Ұмытпаймыз, кешірмейміз" деген ұрандар айтып жатыр