Нұрсұлтан Назарбаев Қазақстан халқына бейнеүндеу жолдады

Тұңғыш президент, Елбасы Нұрсұлтан Назарбаев қаңтар айында болған жағдайға байланысты Қазақстан халқына үндеу жолдады.

– Құрметті отандастар, ардақты ағайын! 2022 жыл халқымыз үшін күрделі де, қатерлі сынақтан басталды. Баршаңызға мәлім, ұйымдасқан қылмысмтық топтар елімізде жаппай тәртіпсіздіктер орнатып, терористтік шабуыл жасады, – деп бастады Елбасы.

Назарбаев жақындары қаза тапқандарға көңіл айтты.

– Соның салдарынан бейбіт тұрғындарымыз зардап шекті. Қасіретті оқиға кезінде қаза болғандардың жақындары мен туған-туыстарының қайғысына ортақтасып, көңіл айтамын, – деді Назарбаев.

Сонымен қатар, Назарбаев қазіргі президент Тоқаевты қолдауға шақырды.

– Лаңкестер елдігіміз бен егемендігімізге, тыныштығымыз бен тұтастығымызға қауіп төндіріп, жұрттың берекесін қашырды. Президентіміз Қасым-Жомарт Кемелұлы Тоқаевтың шұғыл шешімдерінің арқасында ел іргесі сөгілген жоқ. Мемлекет басшысын қолдау – баршамыздың азаматтық борышымыз, – деп қолдады Тұңғыш президент.

Назарбаев Нұр-Сұлтан қаласынан ешқайда кетпегенін және «элитааралық жанжал» болмағанын айтты.

– Маған көптеген өтініштерге жауап бере отырып және бұқаралық ақпарат құралдарындағы жарияланымдарға байланысты мен 2019 жылы президент өкілеттігін Қасым-Жомарт Тоқаевқа бергенімді және сол уақыттан бері зейнеткер екенімді, қазіргі уақытта Қазақстанның астанасында құрметті демалыста екенімді және ешқайда кетпегенімді хабарлаймын.

Президент Қасым-Жомарт Тоқаев толық билікке ие. Ол Қауіпсіздік Кеңесінің төрағасы. Жақын арада президент «Nur Otan» партиясының төрағасы болып сайланады. Сондықтан элитада жанжал немесе қарама-қайшылық жоқ. Бұл тақырыптағы қауесеттер мүлдем негізсіз. Менің 30 жыл бойы Отанымыздың атынан жұмыс істегенімді бәрі біледі, – деді ол.

– Ендігі кезекте осы оқиғадан сабақ алып, мұндай бассыздыққа жол бермеуге тиіспіз. Бабаларымыз ғасырлар бойы аңсаған тәуелсіздіктің отыз жылы ішінде атқарған істеріміз аз емес.

Қазақстан әлемге танылған еңселі елге айналды. Ұлан-ғайыр шекарамыз түбегейлі бекітілді.  Елімізде іргелі реформалар жүзеге асып, Орталық Азияда көш бастадық. Еуразия жүрегінде, Сарыарқа төсінде жаңа астанамыз бой көтерді. Бірлік барда ешбір жау сағымызды сындыра алмас, – деп түйіндеді Нұрсұлтан Назарбаев.