Нұрсұлтан Назарбаевқа ұқсайтын ер адамның фотосы желіні шулатты

Әлеуметтік желіде Қазақстанның бұрынғы президенті Нұрсұлтан Назарбаевқа ұқсас ер адамның фотосы тарап жатыр.

Фотоға назар аударатын болсақ, көлік жүргізушінің бет әлпеті экс-президент Назарбаевқа ұқсайтынын байқауға болады. Осыған орай әлеуметтік желі қолданушылары «Елбасының жалғыз зейнетақыға күнін көре алмай, такси жүргізуші болып жұмысқа тұрды», «қазіргі кезде тіпті экс-президентке ақша табу қиын» деген пікірлерімен бөлісті.

Еске салсақ, Нұрсұлтан Назарбаевтың бірнеше туысы уақытша ұстау изоляторына қамауға алынды. Елбасының немере інісі Қайрат Сатыбалды 13 наурызда аса ірі көлемде «Қазақтелеком» АҚ қаржысын жымқыру фактілері бойынша уақытша ұстау изоляторына қамалды. Қамауға алынған Қайрат Сатыбалды Дубайға ұшпақ болған.

Қайрат Сатыбалдының  бұрынғы жұбайы Гүлмира Сатыбалды шымкенттік шенеуніктермен бірлесіп, Шымкентте нақты орындалмаған құрылыс-монтаж жұмыстарына төленген 747 млн теңгені жымқырды деген күдікке ілінгені хабарланды.

Сонымен қатар, Қаржы мониторингі агенттігі Дариға Назарбаевның бұрынғы құдасы Қайрат Боранбаевқа квазимемлекеттік сектордағы аса ірі көлемдегі қаражатты ұрлады деген айып тағып, ол уақытша ұстау изоляторына қамалды.

Еске салсақ, 18 қаңтар күні Назарбаев қаңтардағы тәртіпсіздіктерден кейін алғаш рет үндеу жасады. Ол өзінің елден кетуі туралы қауесетті жоққа шығарды және наразылық ұйымдастырушылары Қазақстанның мемлекет ретіндегі тұтастығы мен негізін жойғысы келетінін мәлімдеді. Назарбаев Қазақстанның саяси элиталары арасында ықпал үшін күрес жоқ екенін атап өтті.