Нұрлыбек Нәлібаев Қызылорда облысының әкімі болып тағайындалды

Қазақстан президенті Қасым-Жомарт Тоқаевтың жарлығымен Қызылорда облысының жаңа әкімі болып Нұрлыбек Нәлібаев тағайындалды.

«Нұрлыбек Мәшбекұлы Нәлібаев Қызылорда облысының әкімі болып тағайындалсын» делінген мемлекет басшысының жарлығында.

Нұрлыбек Нәлібаев 1976 жылы 13 қазанда Қызылорда облысында дүниеге келген. Кейбір деректер бойынша Нәлібаев Бердібек Сапарбаевтың кіші інісі.

1997 жылы Қазақ мемлекеттік аграрлық университетін, 2003 жылы Қазақ гуманитарлық заң университетін бітірген.

Еңбек өтілі:

• «Қазақойл-коммерс» ЖШС сарапшысы, «Бұлақ» ЖШС директорының орынбасары (1997-1998).
• «Standard Oil Base» ЖШС директоры, «Standard Oil Trading» ЖШС директоры, Standard Gas директорының орынбасары (1999-2002).
• «Шымкентторгсинтез» АҚ Қызылорда филиалының директоры (2002).
• «Қызылорда Мұнай Сервис» ЖШС бас директоры (2002-2004).
• «ПетроҚазақстан» сауда үйі» ЖШС директоры (2002-2004).
• Қызылорда қаласы әкімінің орынбасары, бірінші орынбасары (2005-2007).
• Қызылорда облысы әкімі аппаратының басшысы (10.2007-02.2008).
• Қызылорда облысы Шиелі ауданының әкімі (02.2008-2013).
• Қызылорда қаласының әкімі (02.2013-04.2021).
• ҚР премьер-министрі Кеңсесінің Өңірлік даму бөлімінің меңгерушісі (04.2021 ж. бастап).

Мемлекет басшысының тағы бір Жарлығымен Гүлшара Наушақызы Әбдіқалықова Қызылорда облысының әкімі қызметінен босатылды.

Еске салсақ, бұған дейін Қасым-Жомарт Тоқаев Жамбыл облысының әкімін ауыстырған болатын. Бердібек Сапарбаевтың орнына Нұржан Нұржігітов тағайындалды.