«Нұрия» тұрғын үй кешені тұрғындары Талғар тас жолын жауып тастады

Сейсенбі, 28 желтоқсан кешке Алматыдағы Думан-2 ықшам ауданында орналасқан «Нұрия» тұрғын үй кешенінің тұрғындары ауыз судың үзілуіне наразылық білдіріп, Талғар трассасын жауып тастады. Оқиға орнынан түсірілген видеоны kris_p_talgar жариялады.

«Классика жанры. «Нұрия» тұрғын үй кешенінің тұрғындары жолды жауып тастады. Су жоқ. Талғар трактісі, Бесағаш елді мекені. 22:00» делінген видеоның сипаттамасында.

Кадрдан адамдардың жолды жауып тастағанын көруге болады.

Желі қолданушылары тұрғындардың мұндай әрекетін сынға алды. Оларға келесі жолы әкімдік маңында жиналып, жұмыстан үйге асығып бара жатқандарды бөгемеуге кеңес берді.

«Сізге қызмет көрсететін әкімдік немесе тұрғын үй-коммуналдық шаруашылықты басып алыңыздар. Үйге асығып келе жатқан адамдардың жолын бөгеп, отбасы мен жақындарын көруге асыққандарды сағаттап кептелісте тұрғызу дұрыс емес» деді желі қолданушыларының бірі.

«Мен су жоқ екенін түсінемін, бірақ оған біздің не қатысымыз бар? Олардың кесірінен бәрі кептелісте тұру керек пе?» дейді енді бірі.