Нұрдәулет Айдосов Jusan банкінің басшысы болып тағайындалды

Бүгін «First Heartland Jusan Bank» АҚ Директорлар кеңесі басқарманың жаңа төрағасын тағайындау туралы шешім қабылдады. Нұрдәулет Айдосов Jusan банкінің басшысы болып тағайындалды. Бұл қызметте Айдосов 2019 жылдан бері банкті басқарып келген Айбек Қайыпты алмастырды.

Директорлар кеңесінің төрағасы Шигео Катсу жаңа тағайындауға түсініктеме бере отырып, жақында Айбек Қайып директорлар кеңесінен оны қазіргі басқару қызметінен босатуды сұрағанын айтты.

Нұрдәулет Айдосов 1987 жылы дүниеге келген. Қаржы және құқық саласында үш жоғары білімі бар, оның ішінде Warwick Business School (Ұлыбритания) МВА дәрежесі бар. Ол өзінің кәсіби қызметін HSBC Bank Kazakhstan-да бастаған және қазақстандық және халықаралық қаржы институттарында 14 жылдан астам тәжірибесі бар.

2019 жылдан бастап осы уақытқа дейін «Jusan Invest» АҚ басқарма төрағасы қызметін атқарып, оны Jusan Bank-тегі Private Banking блогының басқарушы директоры лауазымымен бірге алып жүрген.