Нұр-Сұлтанда жасөспірімдер театр күзетшісін соққыға жықты

Нұр-Сұлтан қаласында полицейлер театр күзетшісіне шабуыл жасаған кәмелетке толмаған төрт жасөспірімді ұстады.

«102» арнасына кәмелетке толмағандардың Қонаев көшесіндегі театр күзетшісіне шабуыл жасағаны туралы хабарлама келіп түсті.

Polisia.kz хабарлағандай, мән-жайларды анықтау барысында сағат 18.30 шамасында 14-16 жастағы жасөспірімдер театр жанындағы алаңға скейтпен келіп, өз шеберліктерін көрсете бастады. Сырғанау кезінде оларға 40 жастағы күзетші жақындап, ескерту жасады.

Жасөспірімдер күзетшінің сөзін жауап ретінде елемей, балағат сөйлей бастаған және өз істерін әрі қарай жалғастыра берген. Осыдан кейін күзетші олардың заттары жатқан жаққа қарай бара жатқан. Сөмкесі мен скейтті алып, полиция шақырғысы келген. Бірақ осы сәтте жасөспірімдер оған шабуыл жасап, жан-жағынан соққы бере бастаған.

«Есіл» ауданы полиция қызметкерлері оқиғаның барлық қатысушыларын полицияға жеткізді. Қазіргі уақытта аталған жайға «Бұзақылық» бабы бойынша қылмыстық іс қозғалды. Полиция кәмелетке толмаған балаларды профилактикалық есепке алды. Ата-аналарға қатысты ҚР ӘҚБтК-нің 127-бабы бойынша балаларды тәрбиелеу жөніндегі міндеттерді орындамағаны үшін әкімшілік хаттама толтырылды.