Нұр-Сұлтанда жаяу жүргіншілер жолы опырылып, ішіне түсіп кеткен

Нұр-Сұлтан қаласының тұрғыны Instagram әлеуметтік желісінде жаяу жүргіншілер жолындағы опырылған шұңқырдың бейнетүсірілімін  жариялады.

Онда Тәуелсіздік-Қажымұқан көшелері қиылысындағы жаяу жүргіншілер жолында пайда болған тереңдігі бір метр болатын шұңқырды көруге болады.

— Мына шұңқырды көріп, не айтарымды білмей қалдым. Бұл қалай болғаны? Бұл өте қауіпті! Құдай сақтасын, балалар шұңқырға түсіп кетсе кім жауап береді?,  - дейді әйел.

«Астана Су Арнасы»  баспасөз қызметі  24 сәуірде сағат 17.08-де Тәуелсіздік және Қажымұқан көшелері қиылысындағы жаяу жүргіншілер жолы бөлігіндегі кәріз коллекторы істен шыққандығын мәлімдеді.

— Бұл жағдай көлік қозғалысына кедергі келтірмейді, сонымен қатар  жақын маңдағы тұрғын үйлер ауыз судан ажыратылмайды. Қазіргі уақытта «Астана Су Арнасы» авариялық топ қызметкерлері жаяу жүргіншілер жолындағы коллектор мен жол төсемін қалпына келтіру жұмыстарын жүргізіп жатыр. Уақытша келтірілген қолайсыздықтар үшін кешірім сұраймыз, - деді мекеме өкілдері.