LRT құрылысын аяқтау үшін қанша қаражат жұмсалатыны айтылды

Нұр-Сұлтандағы LRT құрылысын аяқтау үшін қанша қаражат жұмсалатыны айтылды.

Бұл туралы Orda.kz хабарлайды.

Нұр-Сұлтан қаласының әкімі Алтай Көлгінов LRT жобасын аяқтауға қанша қаражат жұмсалатынын айтты.  Оның айтуынша, бастапқыда жоба көлемі 2, 6 миллиард доллар болған.

– Бастапқыда оның көлемі 2,6 миллиард доллар болды. Біз оны 800 миллионнан астам долларға қысқарттық, яғни, үнемдедік. Қазір құрылысты аяқтауға шамамен 1 миллиард доллар қажет. Жалпы, құрылысты аяқтау үшін бізге осынша қаражат қажет, - деп атап өтті әкім халық алдындағы есеп беру кездесуінде.

Әкім жобаның аяқталу мерзімін нақты айтпады. Себебі бұл күнге дейін LRT құрылыстарының біту уақыты бірнеше рет айтылып, орындалмаған.

– Жобаның аяқталар уақыты бірнеше рет айтылды, кейін бірнеше рет жылжытылды. Сондықтан, мен нақты уақытын айтқым келмейді. Қаржыландыру көздерін шешеміз, келісімге қол қоямыз, нақты жол картасы, жұмыс кестесі болады, содан кейін уақытын айтамыз, - деді Алтай Көлгінов.