Нұр-Сұлтанда банк қызметкері депозиттен 6 миллион теңге ұрлап алған

Банк қызметкері 71 жастағы зейнеткердің депозитінен 6 миллион теңге ұрлап кеткен, деп хабарлайды елордалық  ПД баспасөз қызметі.

Елорда тұрғыны депозитінен ақша жоғалып кеткенін айтып, полицияға жүгінгені хабарланды. Қария 2018 жылы қайта салған депозиттегі ақшасын алу үшін банкке келген, ол бұғын дейін ұзақ уақыт депозитін пайдаланбай жүрген. Бірақ банкке келгенде шотындағы  жинақ жоқ екенін байқаған. Зейнеткер  тергеу жүргізу үшін полицияға хабарласқан.

 «Жедел-іздестіру іс-шаралары барысында Нұр-Сұлтан қаласы ІІБ Есіл аудандық криминалдық полиция бөлімінің қызметкерлері ақшаның жоғалуына банк қызметкерінің қатысы барын анықтады. Ол салымшының шотын ашып, жәбірленушінің 6 миллион теңгесін досының есепшотына аударып, кейін қолма-қол ақшаға айналдырған. Ол ақшаны өз қажеттіліктеріне жұмсап үлгерген. Бір күннің ішінде полиция ақшаны жымқырған  адамды анықтап, ұстады» делінген полиция  мәлімдемесінде.

23 жастағы күдіктіге қатысты «Ұрлық» бабы бойынша сотқа дейінгі тергеу амалдары жүргізілуде. Ұсталған азамат кінәсін мойындады. Оның астанада жасалған осыған ұқсас басқа да қылмыстарға қатысы бар екені белгілі болды.