«ҚазақАлтын» есепшотынан 1,5 миллиард теңге ұрлағандар ұсталды

Нұр-Сұлтанда «Қазақалтын» тау-кен металлургиялық концерні есепшотынан 1,5 миллиард теңгені ұрлаған күдіктілер ұсталды, деп хабарлады Ақмола облысы полиция департаментінің баспасөз қызметі.

«ҚазақАлтын» өкілдері полицияға 23 ақпанда компанияның есепшотынан 1,5 миллиард теңгеден астам ақша жымқыру фактісі бойынша хабарласты.

Жедел-іздестіру іс-шараларының нәтижесінде полиция қызметкерлері Нұр-Сұлтанда компанияның қаржы бөлімінің қызметкері - 37 жастағы әйел мен оның зайыбын ұстады.

– ҚР Қылмыстық кодексінің 189-бабы, 4-бөлімі - «Сеніп тапсырылған бөтеннің мүлкін аса ірі көлемде ысырап ету немесе жымқыру» бойынша сотқа дейінгі тергеу басталды, деп хабарлады полиция.

Ұсталғандарға қатысты сот қамауға алу түріндегі бұлтартпау шарасын қолданды.

Тергеу аясында компанияға өтемақы төлеу бойынша шаралар қабылдануда. Тергеу мүдделеріне қатысты басқа ақпарат жария етуге жатпайды.