Автокөліктің «егізі» анықталды

Нұр-Сұлтан қаласының полиция қызметкерлері Алматы облысының тұрғынына тиесілі автокөліктің «егізін» тапты. Бұл туралы Tengrinews.kz ресми сауалына елордалық полиция департаменті жауап берді.

Департамент хабарлағандай, қазір VIN-кодтары бірдей екі автомобильді анықтау фактісі бойынша сотқа дейінгі тергеу жүргізілуде. Іс Қылмыстық Кодекстің 386-бабының 1-бөлігі «көлік кузовының нөмірін қолдан жасау, жалған кузов нөмірімен көлікті өткізу» бойынша жүргізілуде.

«Audi A6 маркалы автокөлігінің «егізі» анықталды. Сот-трасологиялық сараптама тағайындалды. Жоғарыда көрсетілген сараптаманың қорытындысын алғаннан кейін автокөлікті тіркеуді тоқтату және есептен шығару туралы мәселе шешілетін болады», - деп хабарлады Нұр-Сұлтан қаласының полиция департаменті.

Бұған дейін Алматы облысының тұрғыны Юлия Черкасская бір жылдан астам уақыттан бері Audi A6 көлігін пайдалана алмай жүргенін айтқан болатын. Оның айтуынша, Нұр-Сұлтанда осындай VIN-коды бар тағы бір көлік тіркелген. Көлік иесінің техникалық байқаудан өтуге, сақтандыру төлемін және өз көлігіне салық төлеуге мүмкіндігі жоқ.