Нұр-Сұлтанда алғашқы қар түсіп, автобустар кешігіп жатыр

4 қазан кешке қарай жауа бастаған қар салдарынан 5 қазан таңертең елордалықтар қардың астында қалды.

Бұл туралы Orda.kz хабарлады.

Жыл сайынғы жағдай – жергілікті тұрғындар көліктерінің дөңгелектерін қыстыққа ауыстырып үлгермеді. Салдарынан бір тәулікте Нұр-Сұлтанда 96 жол апаты тіркелді.

Сондай-ақ, ауа-райына байланысты Нұр-Сұлтанда көлік кептелісі орын алып, автобустар кешігіп жатыр.

Елордалық CTS көлік компаниясының мәліметінше, маршруттық автобустар кешігуде.

– Ауа райының нашарлауына байланысты (қардың түсуі, көктайғақ) көлік қозғалысы мен қоғамдық көліктің жылдамдығы төмендеді. Автобус бағытында кідіріс бар. Қоғамдық көліктің жолағы жоқ бос учаскелер автобус интервалының бұзылуына көбірек бейім, - деп хабарлады компанияның баспасөз қызметі.

Елорда әкімдігінің мәліметінше, 5 қазанда қаланың жолдарын тазартуға 500-ден астам арнайы техника мен 2 мыңға жуық жол жұмысшысы тартылды.

Бұған дейін алдағы үш күнге ауа-райы болжамы шыққан. Синоптиктер Қазақстан аумағының көп бөлігі солтүстік-батыс антициклонының әсерінде болады деген. Жауын-шашын, тұман, көктайғақ, қар жауады деп болжанған.

Еске салсақ, алғашқы қар өткен аптаның басында Көкшетау мен Қостанайда жауған.

Нұр-Сұлтанда былтыр алғашқы қар 7 қазанда түскен.