Нұр-Сұлтанда 30 млн теңгенің есірткісі тәркіленді

Нұр-Сұлтанның полиция департаментінің мәліметіне сүйенсек, жедел іздестіру барысында Жеңіс көшесінде осыған дейін істі болған 39 жастағы қала тұрғыны ұсталған. Оның сөмкесін тінту барысында гашиш салынған 13 полиэтилен пакеті табылды. Сонымен қатар, күдіктінің пәтерін тінту кезінде гашиш салынған 3 полиэтилен пакеті және сатуға дайын есірткі салынған 32 түйіншек тәркіленді.

«Арнайы операция нәтижесінде заңсыз айналымнан шамамен 20 келі есірткі заты тәркіленді. Оның қара базарда бөлшек сауда кезіндегі құны 30 млн теңгеден асып жығылады. Елорда аумағына есірткі жеткізуге және сатуға қатысы бар қылмыстық тізбенің өзге де қатысушыларын анықтауға бағытталған жедел іздестіру шарасы жүргізіліп жатыр», - дейді бөлімшеде.

Қазіргі уақытта ұсталған адамның үстінен ҚР Қылмыстық кодексінің 296-бабы 4-бөлігі, 297-бабы 3-бөлігі және 287-бабы 2-бөлігі бойынша қылмыстық іс қозғалды. Күдікті 10-нан 25 жылға дейін бас бостандығынан айырылуы мүмкін. Қазіргі таңда 39 жасар азамат уақытша қамауда, тергеу амалдары жүріп жатыр.