Нұр-Сұлтанда 133 заңсыз паркоматтар алынады

Нұр-Сұлтанда мамандандырылған ауданаралық экономикалық сот заңсыз орнатылған ақылы автотұрақтарға қатысты шешім шығарды.

Нұр-Сұлтан жол-көлік инфрақұрылымын дамыту басқармасы «Астана паркинг кеңістігі» ЖШС-не қарсы іс қозғады. Әкімдік өкілдері компаниямен келісімшартты бұзып, паркоматтарды бөлшектеуді талап етті.

Сот анықтағандай, 2017 жылы тараптар Нұржол бульвары ауданында ақылы автотұрақтарды құру туралы келісім жасасты. Алайда кейінірек компания елорданың басқа жерлеріне паркоматтарды тиісті құжаттарсыз орнатқан. Компания әкімдіктің келісімшартты бұзу және паркоматтарды бөлшектеу туралы талаптарын елемеді.

– 2018 жылдың 7 қарашасындағы №1 қаланың ақылы автотұрағын құру, пайдалану және басқару жөніндегі келісімшартты бұзу туралы талап арыз және паркоматтарды демонтаждау бойынша жұмыстарды өндіруді қамтамасыз ету жөніндегі міндеттеме қанағаттандырылсын, делінген хабарламада.

Сот шешіміне сәйкес, компания Нұр-Сұлтандағы 133 автотұрақты бөлшектеуі керек.