Нұр-Сұлтан әуежайының есепшісінен бес көлік тәркіленді

Жалпы, 2019 жылдың басынан бастап қылмыстық істер бойынша 1 миллиард теңгеден астам мүлік тәркіленген. Бұл туралы Сыбайлас жемқорлыққа қарсы іс-қимыл агенттігінің ерекше маңызды істер жөніндегі тергеушісі Данияр Биғайдаров мәлімдеді.

«Тек бір іс бойынша, атап айтсақ, «Астана халықаралық әуежайы» АҚ бас есепшісі Әлия Бабашевадан мемлекет кірісіне5 көлік тәркіленді (Lexus LX 570 – 2018 ж.ш, Mercedes Benz GLS 500 4 matic – 2018 ж.ш, Toyota Highlander – 2018 ж.ш, Toyota Camry – 2019 ж.ш, Toyota Camry – 2017 ж.ш) », - деді Данияр Биғайдаров брифингте.

Ол 2015 -2020 жылдар аралығында қылмыстық істер бойынша мемлекетке белгіленген 174,4 миллиард теңгенің 120 миллиард теңгеден астамы (121,2 миллиард теңге) өтелді деп қосты.

«Келтірілген зиянды өтеу жылдан жылға өсіп келеді. Егер 2015 жылы мемлекетке тек       5 миллиард теңге өтелсе (9,5 миллиард теңге белгіленген), 2020 жылы бұл сома 10 есеге - 50,7 миллиард теңгеге дейін өсті (жиынтық - 60 миллиард теңге). Салыстыру үшін бұл шамамен 50 орта мектеп, ковидтік науқастарға арналған 10 модульдік аурухана немесе 1690 ойын алаңдары», - деп атап өтті спикер.