Нұр-Сұлтан мен Алматы әкімдіктері маңы қоршауға алынды

Екі қалада да әкімдіктер орналасқан ғимараттың  айналасын полиция қоршап, жедел жәрдем қызметі кезекшілік етіп тұр.

Orda.kz. тілшілері оқиға орындарында болды.

Кеше желіде сенбі күні сағат 12-ге дейін бүкіл Қазақстан бойынша әкімдік ғимаратына митингке шығуға шақыру туралы ақпарат тараған болатын.

Алаң маңында барлық жерлерде дерлік автозактар қойылып, әкімдікке ешкімді жолатпады.

Нұр-Сұлтан қаласында сағат  12-ге таман екі-ақ әйел келді.

— Біз өзімізді вакциналауға қарсымыз және балаларымызды да вакциналауға жол бермейміз. Бізге олардың вакцинасы мүлде қажет емес, - деді Бақыт Қазбекова.

Сонымен қатар әйелдер зейнеткерлік жасты 58-ге  дейін төмендетуді талап етті.

Кейін наразылық білдірушілердің саны артты. 57 жастағы Астана тұрғыны Балқия Қазыбаева мәжбүрлі вакциналауға қарсы пікірін білдірді.

 — Адамда өзінің иммунитеті болуы керек, ағза өзімен өзі күресуі қажет. Бұл тұрғыда адамның жеке құқығы болуға тиіс  — екпе  алғысы келетіндер ала берсін, қаламайтындарға  мәжбүрлеудің қажеті жоқ. Егер маңдайыма биыл  өлу жазылса, онда мен вакцинасыз да өлемін, - деді қала тұрғыны.

Сарыарқа ауданы санитарлық-эпидемиологиялық бақылау бөлімінің жетекші маманы Сұлтан Аяз әйелден бетперде киюді, ал қалғандарына тарауды сұрады. Ол жай ғана «өтіп бара жатып» көріп қалғанын, сөйтіп ескерту жасауға келгенін айтты.   

Зейнеткер Тұрсынкүл Түбекова Нұр-Сұлтандағы коронавирус жұқтырғандардың көбеюі халықты жаппай вакциналаумен байланысты екеніне сенімді. Оның пікірінше, науқастардың көпшілігі вакциналанған адамдар. Ол өзі халық емімен және тағамдық қоспалармен емделуді жөн көреді екен.

Сонымен,  Нұр-Сұлтандағы митингке тек бес қарт ана ғана  жиналды.

Зейнет жасын төмендету жөніндегі әйелдер қозғалысының жетекшісі Бегастанова Майкен үкіметтен зейнет жасын 58-ге дейін төмендетуді сұрады. Әйелдерге бұл жаста жұмыс істеу қиын екенін,  әсіресе карантин кезінде оларды ешкім жұмысқа алмайтынын жеткізді.  

Сондай-ақ,  наразылық білдірушілер оларды осы акцияға қатысқандары үшін қудаламауды өтінді. Ақ жаулықты аналар өз демонстрацияларын әкімдік қызметкерлерінің алдында әнмен аяқтады.

Осы уақыт аралағыныда  Алматыдағы митингке ешкім келмеді, дегенмен әкімдіктегілер алдын-алу шараларын қарастырып,  ескі алаң аумағын қоршап тастаған.

Журналистерді әкімдік жаққа беттетпеді. 

—  Бізге берілген тапсырма солай. Біз сізді кіргізе алмаймыз. Әкімдіктің аумағы жабық, - деп түсіндірді тәртіп сақшысы.

Оқиға орнында болған арнайы тілшілер: Нұр-Сұлтанда —  Асема Гумарова және Аделаида Әуеспекова. Алматыда —  Бек Байтас.