Нұр-Сұлтан: Мұқтаж отбасыларға көмек сұраған алаяқ ұсталды

Polisia.kz-тің хабарлауынша, мұқтаж отбасыларға көмек көрсету сылтауымен ақша жинаған 21 жасар күдікті ұсталды.

Осыған дейін бойжеткен ҚР Қылмыстық кодексінің 189-бабымен қылмыстық жауапқа тартылған. Ол 2019 жылдың қаңтарында Instagram әлеуметтік желісінде «komissionka_nursultan» парақшасын ашқан. Содан бастап қайырымдылықтың атын жамылып заңсыз түрде ақша жинаған. 21 жасар бойжеткеннің күдікті іс-әрекетін парақшаға жазылғандарың бірі әшкере еткен.

Ақпаратқа сүйенсек:

«Мұқтаж отбасыларға көмек көрсетуді шешкен ол бойжеткеннің банктік картасына 20 500 теңге ақша аударған. Зардап шегушінің айтуынша, біраз уақыт өткеннен кейін оның әрекетінен күдіктене бастаған. Көмек көрсету үшін мұқтаж отбасылармен кездестіру өтінішіне түрлі сылтау айтып, кейіннен байланысқа мүлдем шықпай қойған. Өзін алдап кеткенін түсінген зардап шегуші полицияға жүгінген».

Күдікті өз кінәсін мойындады. Қазір ҚР Қылмыстық кодексінің 190-бабы 2 бөлігі бойынша 10 эпизодпен сотқа дейінгі тергеу амалдары жүріп жатыр. 400 мың теңге көлемінде шығын келтірілді.