Нұр-сұлтан әкімдігі Аружан Саинның шағымына жауап берді

Балалар омбудсмені Аружан Саин елордадағы бос үйірмелер мен учаскелердегі орындарды бөлуде  заң бұзушылықтар болғанын жазған. Нұр-Сұлтан әкімдігі белгілі бір жеткізушіге артықшылық беруге және ваучер таратуға мүмкіндігі жоқ екенін мәлімдеді.

Елорда әкімдігі баспасөз қызметінің мәліметінше, жергілікті атқарушы органдар ұсынатын операторлар Мәдениет және спорт министрлігі бекіткен ережеге сай жобаны платформа арқылы жүзеге асыруда. 

«Әкімдік ұсынған оператор нақты жеткізушіге артықшылық беріп, ваучерлерді тарата алмайды. Платформаның қағидаттары бойынша баланың заңды өкілі жеткізушілерді өз бетінше таңдайды» делінген елорда әкімшілігінің жауабында.

Қала әкімдігі Мәдениет және спорт министрлігіне барлық  мәселелер бойынша арнайы хат жолдап, оларды жою жөнінде ұсыныстар бергенін мәлімдеді. 

Елордада спорт үйірмелеріне тегін тартылатын балалардың саны бір мыңнан 17 мыңға дейін өскен.

Бұдан бұрын Аружан Саин елорда әкімдігі тегін үйірмелер мен секцияларды тарату жұмыстарында «таныстыққа» жол беретіндігін айтқан болатын. Сонымен қатар ол ата-аналардың таңдаулы тобы қысқа мерзімде Болмановтар  мектебіне өтініш бергенін атап өткен. Аружан республиканың уәкілетті органдары тарапынан істің шынайылығын анықтауды сұраған болатын.