Нұр-Сұлтан блогерлерге тур ұйымдастырады

Блогерлер мен туристік ұйымдарға арналған тағы бір тур қазақстандықтарға 17 млн теңгеге түседі.

Бұл туралы Orda.kz хабарлады.

Блогерлерге, халықаралық қауымдастықтарға, жетекші шетелдік туроператорларға арналған шара «АстанаИнвест» ЖШС тапсырысы бойынша өтеді. Конкурсқа қатысуға өтінімдер мемлекеттік сатып алу сайтында қабылданды.

Барлығы төрт оқу туры болады, олардың әрқайсысына үш-алты адам қатысады. Қонақтар бес жұлдызды қонақүйлерге орналастырылады. Олар түскі және кешкі асты еуропалық және ұлттық тағамдар мейрамханаларында қабылдайды.

Жеткізуші қатысушылардың Нұр-Сұлтанға баруы мен кері қайтуын, тұруын, тамақтануын қамтамасыз етуі керек.

Әр тур үш күнге есептелген және туристік орындарға, құрметті қонақ үйлер мен қаланың көрікті жерлеріне баруды қамтиды.

Олардың қатарында:

• Назарбаев Университеті
• Қазмедиа Орталығы
• Ұлттық музей
• Бейбітшілік және Келісім сарайы
• Тәуелсіздік сарайы
• Спорт ғимараттары
• Hilton Astana қонақүйлері
• Ritz Carlton Astana
• St. Regis Astana
• Astana Marriott
• Sheraton Nur-Sultan
• Radisson Astana
• Park Inn by Radisson
• JCI аккредиттелген медициналық орталықтары кіреді.

«Қазақтың ұлттық мәдениетін, әдет-ғұрпын, салт-дәстүрін, фольклорын, күнделікті тұрмысы мен ұлттық тағамдарын» көрсету мақсатында қонақтарға іс-шаралар мен шеберлік сыныптары ұйымдастырылады.

Ал мұның бәрі шетелдіктердің астананың іскерлік туризм саласындағы әлеуетін білуі үшін қажет.

Авторы: Аделаида Ауеспекова

Аударған: Айнура Дарибаева