Ән айтып танылған сылақшы қыз анасы туралы мәлімдеме жасады

Қызылорданың тумасы Гүлмайдан Серікбай алғаш рет өзінің ата-анасы туралы сөз қозғады. Оның айтуынша, анасын көлік қағып кеткен, ал әкесі ауылда қалып қойған.

«Менің өмірім» бағдарламасына берген сұхбатында Гүлмайдан отбасы жан-жаққа шашырап кеткені туралы айтты.

«Мен мектеп бітірген соң ауылдан қалаға көшіп кеттік. Біз қарапайым отбасымыз. Әкем мен анамның мінезі жараспады. Мен 18 жасқа толдым. Ағам астанаға жұмысқа кетті. Әкем ауылға мал бағуға кетіп қалды. Анам Алматыға кетті. Төртеуміз төрт жаққа кетіп қалдық. Мен туысымның үйінде тұрып жүрдім. Әй дейтін әже, қой дейтін қожа болған жоқ. Анаммен хабарласып тұрдым. Жолдасымды таныстырып, алдынан өттік. Ол орыс болғандықтан, той жасамадық» деді Гүлмайдан.

Гүлмайдан анасының бақилық болғанын естіп, күзеліске түскен. Анасын көлік қағып кеткен.

«Анаңды көлік қағып кетті деп хабар берді. Мен түк түсінбедім. Жыламадым да. Себебі, сенбедім. Өтірік секілді болды. Түс көріп жатқан секілді болдым. Ішімде 3 айлық бала бар еді. Ағам екеуміз Алматыға келіп, жаназасын шығардық. Мен тіпті дауыс шығарып жылай алмадым. Туыс әйелдер неге дауыс шығармайсың деп сөкті. Мен ішімнен тынып жыладым. Кейін қанша күн жылап жүрдім» дейді Гүлмайдан Серікбай.

Оның айтуынша, анасының өлімінен кейін араға төрт жыл салса да, оның орнын басатын адам жоқ.

«Анамды әлі күнге сағынамын. Қазалы оқиғадан кейін 4 жыл өтті. Анама кей сырларымды айтқым келеді. Анаңның орны ерекше. Ешкім анаң секілді бола алмайды. Тірі болғанда осылай болар еді деп өкінетін кездер жиі болады. Бірақ амал жоқ. Бәріміздің ажалымыз бар. Анамның ажалы осылай болып тұр. Соған көндік. Алланың жазуы деп қабылдадық» дейді әнші.