Мырзағалиев Қашаған кен орнындағы жөндеу жұмыстарымен танысты

28 қазанда «ҚазМұнайГаз» ҰК АҚ басқарма төрағасы Мағзұм Мырзағалиев Қашаған кен орнында болып, «Болашақ» зауытындағы жөндеу жұмыстарының барысымен танысты.

North Caspian Operating Company (NCOC) басқарушы директоры Оливье Лазар «Болашақ» кешені мұнай-газ өңдеу зауытының газды өндіруге дейінгі қондырғысындағы жөндеу жұмыстарының ағымдағы жағдайы туралы баяндады.

Нысандарды аралау барысында Мырзағалиев жөндеу жұмыстарын тезірек аяқтау қажеттігін атап өтті.

Бүгінгі таңда өндіріс деңгейін қалпына келтіру бойынша барлық механикалық жұмыстар аяқталды, қондырғы бірнеше күн ішінде іске қосылады деп күтілуде.

 2 қыркүйекте «Қазмұнайгаз» ҰК» АҚ басқарма төрағасы Мағзұм Мырзағалиев Атырау облысына жұмыс сапары аясында Солтүстік Каспий жобасының өндірістік нысандарын аралаған болатын. Одан кейін ҚМГ басшысы бөлімшеде ақау тудырған себептерді анықтау мақсатында жүргізілетін тексеру бағдарламасымен танысты.

Еске салайық, 3 тамызда Қашағанда «Болашақ» мұнай-газ кешенін өңдеу зауыты қож ұстағышта газдың шығу белгілерінің табылуына байланысты жұмысын тоқтатқан болатын. 9 тамызда өндіру тәулігіне 100 мың баррель деңгейіне, 30 қыркүйекте тәулігіне 210 мың баррель деңгейіне дейін ішінара қалпына келтірілді.