Мүмкіндігі шектеулі баланың құқығын бұзған әуе компаниясына айыппұл салынды

Астанада мүмкіндігі шектеулі баланың құқығын бұзған әуе компаниясына айыппұл салынды, деп хабарлады Orda.kz.

Бас көлік прокуратурасының мәліметінше оқиға өткен жылдың 3 қарашасында болған. Санкт-Петербордан ұшатын ұшақ жерге қонғаннан кейін балаға мүгедектер арбасын бермеген. Ұзақ күткеннен кейін әкесі баланы ұшақтан өзі алып шыққан.

«Әуе компаниясы кәмелетке толмаған мүмкіндігі шектеулі жолаушыға дұрыс  қызмет көрсете алмады. Қызметтің уақтылы көрсетілмеуіне авиакомпания қызметкерлерінің мүгедектер арбасының қажеттілігі туралы қате хабарламасы себеп болды» деп жазылған хабарламада.

Прокуратураның хабарламасына сәйкес, әуе компаниясы әкімшілік жауапкершілікке тартылды. Әкімшілік кодекстің 571-бабына сәйкес, халықаралық тасымалдау ережелерін бұзу 50 АЕК – 196 мың теңге көлемінде айыппұл салуға әкеп соғады. Қадағалау органы қай авиакомпанияның бұзушылыққа жол бергенін нақтыламады.