Мүфтият биткоин криптовалютасын харам деп атады

Қазақстан мұсылмандары діни басқармасының ғұламалар кеңесі криптовалютаны пайдалануға тыйым салды. Дінтанушылар бұл шешімнің не үшін қабылданғанын түсіндірді, деп хабарлайды Orda.kz. 

Криптовалюта - криптографиялық технологияларға негізделген цифрлық ақшаның бір түрі. Криптовалюталардың бірнеше түрі бар. Олардың бірі - биткоин. ҚМДБ биткоинды пайдаланбауға шақырды.

ҚМДБ мәліметінше, биткоин мемлекет тарапынан реттелмегендіктен нақты активтері жоқ. Әрі бағасы күрт өзгеріп, адамдарға қаржылық зиян келтіруі мүмкін.

Шариғат бойынша кез-келген ақшаны мемлекет шығарып, қорғауы керек. Биткоин ұлттық валюта емес. Кез келген уақытта оның нарығы күрт көтерілуі немесе құлдырауы мүмкін.

Сонымен қатар биткоин процестері жиі жабық түрде жасалады. Бұл өз кезегінде шариғат тыйым салған алдау мен алаяқтыққа әкеледі.

Мысырдың пәтуа комитеті, Еуразия мұсылмандарының пәтуа шығару кеңесі сияқты ірі ұйымдар биткоин криптовалютасын пайдалануға тыйым салды.