«Мұндайды оқу өте ауыр»: Ғимараттан құлаған қыздың әкесі мәлімдеме жасады

Алматыда 16 қыркүйек күні Есенберлин атындағы №25 мектептің жетінші сынып оқушылары М.Айша мен Д.София  сабақтан шығып, бөтен үйдің шатырына шығып, екеуі бірдей шатырдан секірген еді. Осы қайғылы оқиға жайлы Айшаның әкесі, белгілі эколог Евгений Мұхамеджанов мәлімдеме жасады, деп хабарлайды Orda.kz.

Ол өз жазбасында қолдау көрсеткен жанашыр адамдарға алғысын айтты.

«Бізге шынайы қолдау көрсеткендердің бәріне ризалығымды білдіремін. Періштемнің жақсырақ әлемге, арғы өмірге аттанғанына бір апта болды. Әзірге миым бұл жағдайды толық қабылдаудан бас тартады. Мен өзімді жұмыспен алдарқатуға тырысып жүрмін. Бірақ оңай болып жатқан жоқ. Тергеу органдарына үлкен үміт артып отырмыз. Біздің резонанс арқылы басқа істерді де егжей-тегжейі ашылуына мүмкіндік бар» деп жазды Евгений Мухамеджанов Facebook парақшасында.

Сонымен қатар, ол қайғылы оқиғаға байланысты пайда болған көп фактілер мен сыбыстар жайлы да сөз қозғады.

«Полицияның жалған ақпарат тарату қылмыстық жауапкершілікке тартылатынын ескерткеніне ризамын. Қаншама адам орынсыз, кейде тіпті жиіркенішті нәрселерді жазып жатады. Ең сорақысы, бұған БАҚ-тың да қосыла кетуі болып тұр. Мұндайды оқу өте ауыр тиеді» деп атап өтті ол.