Мұхамеджан Тынышбаевтың ұлы өмірден өтті

Ғалым, техника ғылымдарының докторы Дәулет Шейх-Әли-Тынышбаев АҚШ-та өмірден өтті, деп хабарлайды Orda.kz. 

Бұл туралы баспагер Бақытжан Бұқарбай мәлімдеді. Дәулет Тынышбаев Алаш арысы Мұхамеджан Тынышбаевтың ұлы. 

Дәулет Мұхамеджанұлы 1964 жылы И.М.Губкин атындағы Мәскеу мұнай-химия және газ өнеркәсібі институтында «Мұнай және газ кеніштерін игеру» мамандығы бойынша кандидаттық диссертациясын табысты қорғап шығады. Сол жылы Уфа мұнай ғылыми-зерттеу институты­ның қойнаудағы мұнай және газ зертханасының жетекшісі болып тағайындалады. Осы жерде 18 жыл тұрақты еңбек етеді. 

1983 жылы Дәулет Мұхамеджанұлының бастамасымен қойнау және қойнаудағы газ іспетті сұйық магма құрамдарының коллекторлық қасиеттерін зерттеу бойынша ғылыми-зерттеу бөлімі ашылып, осы бөлімге жетекшілікке жіберіледі. 2001 жылға дейін тағы да 18 жыл қызмет етеді. 

Дәулет Мұхамеджанұлы – 150-ден аса ғылыми еңбектер мен авторлық куәліктердің иесі.