Мұғалімді балағаттап НЗМ-нен қуылған оқушы аттестат алды

Назарбаев зияткерлік мектебінде оқуының бітуіне 2 күн қалғанда оқудан шығып кеткен Сұңқар емтиханын тапсырып, аттестатын алды, деп хабарлайды Orda.kz.

Бұл туралы заңгер Жангелді Сүлейменов өзінің Facebook парақшасында мәлімдеді.

«НЗМ Сұңқарды 23 мамырда 11-сыныптан шығарды және ол 1 қыркүйектен бастап қарапайым мектепке барып, сонда тағы бір жыл оқуға тиіс болған еді. Бірақ Сұңқарға емтихан тапсыруға рұқсат беріліп, аттестатын алды», – деп жазды заңгер.

Сұңқарға 1 жыл қайта оқудың орнына бірден рұқсат берілгенінің себебін сұрау үшін Orda.kz редакциясы Оқу-ағарту министрлігіне сауал жолдады.

Еске сала кетейік, Сұңқардың оқудан шығуы туралы жанжал мамыр айында болды. 11-сынып оқушысы емтиханға телефон алып келді. Мұны байқаған мұғалім оның емтихан жауабын жойып, гаджетті тартып алған. Оған ыза болған жасөспірім мұғалімді балағаттады. Осы жағдайдан кейін мектеп әкімшілігі оқушыны НЗМ-нен шығарып жіберген болатын. 

Бұл оқиға қоғамның назарын аударды. НЗМ-ді оқушының құқығын таптады деп топшылағандар да болды. Алайда көптеген қазақстандықтар педагогты қолдап, жоғары сынып оқушысы оқудан шығарылуға лайықты деген пікірді құптады.