Мұғалімді балағаттағаны үшін оқудан шығарылған оқушы ауруханаға түсті

23 мамырда мұғалімді балағаттағаны үшін мектептен шығарылған 11-сынып оқушысы ауруханаға жатқызылды, деп хабарлайды Orda.kz.

Назарбаев зияткерлік мектебінің оқушысы сабақ үстінде мұғалімді балағаттап, басқа балалардың көзінше тіл тигізгені үшін білім ордасынан шығарылған еді.

Мектеп директоры Әнуар Жанғозиннің айтуынша, оқушының оқудан шығарылуына негіз болатын нақты дәлелдер бар.

«Мұғалім телефонды мектеп ережесіне сай алып қойған. Алайда оқушы шатақ мінез көрсетіп, мұғалімге дөрекі әрі қорлайтын сөздер айтқан. Мұндай әрекет мектеп тәртібіне, мұғалімге құрмет көрсету қағидаттарына және жалпы адамгершілік құндылықтарға қайшы. Айта кету керек, бұл оқушының тәртіп бұзуы алғаш рет емес», — деді мектеп басшысы.

Оқиғаға байланысты оқу-ағарту министрі Ғани Бейсембаевтың тапсырмасымен мектепке Балалардың құқықтарын қорғау комитеті мен аумақтық департамент өкілдері жіберілетін болды.

Еске салайық, бұған дейін 11-сынып оқушысы бейнеүндеу арқылы көпшілік алдында кешірім сұраған болатын.